KaasihNa, ka pun bojo

palawargi sadaya, pamaos ieu blog nu di pikaasih ku GUSTI...
ieu mah raraga, dina minangka ngabangbrangkeun manah anu teu puguh, ramijut tur kacida pabaliutna. Dalah kumaha ngalaman kajantenan anu sakitu sedihna.

ti payun kuring teh nyanggakeun Panuhun Ka Allah, kumargi MantenNa anu ngaberkahan naon rupi anu kaalaman ieu teh. Hapunten ka nu disebat namina, dan sanes kirang sopan tapi tampi jadi rasa hormat kuring ka anjeun sadaya. Hatur nuhun.

dinten Salasa, 17 Maret 2009, teu gugur teu angin ujug-ujug ngagedur seuneu kana tutumpakan nyaeta motor butut nu sok satia maturan nganteur kamamana, euleuh hate meni ngagebeg bari jeung deuih di payuneun rorompok pisan. Gura-giru nyiar cai, tuluy diguyurkeun kana motor supados seuneu teu ngabebela, alhamdulilah eta ge reup pareum. Ah da motor mah tutung we.

Geuning baruk lain ku kituna kuring jadi nalangsa, tapi asa katinggang duren pas taar tuluy dikusruk kana lombang cucuk eurih. Dak dumadak isukna ping 18, pun bojo ujug-ujug balieung we tuluy geubis di pawon, utah meni ngaborolo, lieur ceunah. Bumi alam asa muter, langit asa janten kumaha, bari jeung muriang.

emh, eta mah kaweur, kaweur pisan,....

Tuluy ngadu'a, kaduana mah nilpun we ka Pa Agus Sito nyuhunkeun pitulung da kedah nganggo wahon ka rumah sakit, pon kitu deui teu aya artos deuih kuring teh. Dugi di ugd rumah sakit, tuluy diparios ku dokter, cos we diasupan jarum impus, euh eta mah meni hese teh dimpus, karunya teuing pun bojo, meni nyerieun. Malah mah si jalu, murangkalih kuring 'Aldika' sanaos yuswana nembe genep taun tapi ngartos pisan, bageur budak teh.
Rengse di parios teh da cenah kudu dirawat lantaran vertigona beurat, euh euh. Tah, didieu yeuh titah mayar sakitu ratus keur daptarna, ubarna sakitu ratus, hadena we aya pa agus keneh jeung aya bu pamiyati deuih. Eta nu jaga di apotek teu pira kurang dua rebu meni kudu narik urat beuheung kuring, ambek nyedek tanaga midek,... geuleuh atuh maenya teu sapira meni hese, hadena we koreh-koreh aya duit teh, harita pun bojo ngan aya saratus deui, kuring we na pesak aya meureun pat puluh rebu mah. dasar ontohod teh.

Jadi weh dinten rebo teh lebet ka rumah sakit, euh bingung duit euweuh, budak rek saha nu ngurus, mimilu we budak teh da rek jeung saha diimah oge. pan kur tiluan hirup teh, kuring, pamajikan, katilu budak. Tuluy budak teh dititipkeun we heula, sorena disamper ka bu pamiyati. peutingna bati ukur ngaheruk we ningali pamajikan, budak ngagoler dina lahunan. emh hampura ama nya.

kemis isuk, maksa we rek menta duit da geus euweuh duit teh atuh, dibere we kas bon sajuta, ah rada regreg saeutik, da lain ku duit meh tenang mah tapi sangkan pun bojo tiasa sehat, sabihara-bihari deui. Budak lapar aya keur meuli sangu, meuli ubar aya sayogi, tapi da dalah kumaha awak pasiksak pisan lantaran teu sare ti malem rebo, nepi ka ayeuna malem jumaah. Tungtungna nyalukan 'mamah', mamah datang kacida bingahna laen kur bisa sare lantaran aya nu ganti ngarawat pamajikan tapi aya indung teh regreg hate. nu matak ge kudu nyaah ka indung teh, ih minantu na ge da geuning sakitu dinyaahna, ari mitoha mah teuing kamana.

jumaah pabeubeurang mah kuring teh kakantor da teu jauh ti rumah sakit. Sok we duit ka nu jadi indung bisi aya kitu kieu ma'lum da rumah sakitna rada rada geuning. Yap budak di pangku tuluy geuleuyeung we make motor ka kantor. Eta mah budak nya enyaan pisan pangbeberah manah teh, di jalan teh pok we nyarita "euh ama geuningan soca teh peureum, kumaha ningalina ka jalan?" atuh kuring teh seuri....heuheuy deudeuh da meureun panon teh rapet bakating ku bagadang. Lumayan ah sajam dua jam ge, budak ge kitu sare, hudang teh langsung we deui ka rumah sakit, dugi ka rumah sakit indung mah jeung incuna sina balik we. Palalaur budak kumaha onam. Atuh kuring ngajagaan bari ngalayanan naon anu dibutuhkeun ku pun bojo.
Malem sabtu, malem minggu ah rada jagjag geuningan, teu pucet deui. Kuring teh meni pok we ka dokter menta mulang, ih kasebelan dokter teh teu meunang ceunah, ari demam berdarah na mah cageur ngan ieu aya deui pireus ceunah. EUH pireus nanahaon deuih atuh nya?

dipariksa tilu poe lilana, harita teh dinten rebo deui wae, emh saminggon we meureun, kapendak ku laboratorieum yen pun bojo keuna ku MALARIA. Asa kabentar gelap atuh kuring teh, asa poek mongkleng ieu dunya, asa eungap na dada, ya ALLAH, GUSTI naha naon ieu teh, Jaba ning Dokter teh lieureun deui naha bisa ceunah kana panyawat ieu? pan da kuring sakulawargi teh teu kamamana boro raah ka luar pulow ka kota ge langka, da teu boga duit.

Duit deui nu jadi masalah, kas bon atos, gajih tos dipenta tipayun. meni seueul teh kana angen, poe ka salapan ping 26 aya bongbolongan harita pa rahmat miwah garwa minangkana mah ngalongok bari jeung pakepuk itu ieu, jadi weh teu kudu deui meuli ubar kontan, padahal senenna hape kanyaah geus di lelang. Ping 27 bu rahmat masihan ranjang, euh bu nuhun pisan. Da dalah kumaha atuh imah teh teu ngontrak-ngontrak acan, ceuk bodorna mah napel wungkul di imah nu dicicingan teh, imah na mah nu pa silas. Keun we lah. Ping 28 dokter semu bingung basa marios teh, lantaran da eta enjing na utah deui pun bojo teh, tuluy siangna keun ngagibrig kabulusan, tiriseun akibat ti malaria tropikana anu belegug teh,... Isukna pasisiang dei ngagibrig deui aduh meni sedih pisan, ditangkeup we bojo teh, bari teu kendat-kendat ngadu'a da puguh ngaco anjeunna teh. Geus sieun we jeung sieun kuring teh. Tuntungna ceuk dokter kudu aya ubar anu aranna primakuin. Meni lieur euy neangna, eweuh sa Bekasi, tuluy ka pilanceuk kang ode milarian di jakarta, rayi si anes, milarian di cikarang dibantosan ku wa ucu...emh wa hampura wa jadi weh kitu, hampura wa istri....
eta ubar teh euweuh dimana-mana, dokter kuatka nyarios ngadu'a we nya ceunah, sumerah. klorkuin mah hantem we diberean nu tina dosis kusu teh jadi 3 X sadinten. Astagfirullah ! nu ngalongok mah geus kumaha meureun, kuring rikat nga es em es kabeh baturan sina ngadu'a ka GUSTI nu MAHA ASIH, supados masihan kakiatan sarta tiasa ngajantenkeun mujisatna nyata. atuh bener we, Bu Rahmat anu kaparengan aya dinten eta telpun ka ditu kadieu, kenging we ti Solo, meni caket nya! Pa Yani jeung Bu Yani anu datang wengina dugi ka bawa ku emosi eta mah suster nu teu nyahi nanaon ge kabarerang ku duaan, gara-gara primakuin tea sikasebelan. Prima kuin teh ubarna nu kudu aya ceuk dokter. Klorokuin geus teu mempan meureun.
keur pahibut susah teh aya we deui budak ngadak-ngadak panas ngaheab, atuh durugdug ka dokter, tilu poe geringna teh ku mamah we di asuh, bari kuring bulak-balik ka imah gantian jeung mamah ngajaga nu garering. pasiksak ieu awak. teu dirasa we da kumaha atuh.
ti tempat gawe lain kadua ngabeberah kalah huh ngariweuhkeun komo eta bos percetakan, meni teu ngarti nya. kitu deui nu nyekel duit meni hese teh euy dasar ari nu beunghar nya sok ngajejeh, keu we siah nu kaniaya mah du'a na sok manjur, kade euy, bisi aing teh salah ucap maraneh jadi cilaka! ah paralun.
Puguh ge Bu Ami weh tungtungna mah nguruskeun kas bon, hutang jeung ngaganti bon ubar teh, atuh nyekel meureun kana dua juta poe senen teh meni bungah asa hayang hiber ka Solo nyokot ubar, harita aya hiji ibu nu ceunah rek nulungan ah tungtungna mah kalah lieur. antep we. Suster aya nu boga ceunah, ih nepi ka ayeuna keur nulis ieu euweuh ubar teh. hahahahahha...
Ah nu puguh mah kaasih Gusti we nu nangtayungan, ubar nu didagoan teh datang poe kemis ping 2 april, bungah amar wata suta bugah kagiri-giri ceuk dina wayang mah, malah mah ubar teh meni loba pisan, sawareh mah di pasih keun ka rumah sakit. Da eta suster teh ngadak jadi bageur, milu ceurik sirikna mah keur pamajikan kristis, milu seuri keur jag jagna, nuhun suster-suster anu gareulis, anu balageur. Mugia Sih Kurnia Gusti Allah nu malesna.
Kaasih Gusti Allah, estu nyata saatos eta ubar aya, dokter ge ngidinan kuring mulang ka rorompok, atuh ping 3 jumaah harita teh kuring mulang.
Sajeroning di rumah sakit nu neken wae aya (ti pihak pagawean) nu ngahibur aya. biasa meureun eta mah. Pun Bojo mah komo ongkoh gering tapi bisa ngabeberah manah batur. hebat euy. kuring mah geus euwueuh we kaasih ka batur, eta pun bojo mah meni darehdeh, jeung tiasa ngahibur batur pada pasien nu sami gering.

Tuh nya Sih Kurnia Gusti mah hebat, ngalangkungan ti sagalana. Hatur Nuhun Gusti ALLAH, hatur nuhun.
Sakantenan ah bade ngahaturkeun nuhun ka :
Pa Rahmat sareng ibu rehna tos ngabantos sakitu seueurna ka kuring dugi ka pun bojo leres-leres sehat. Oge ka pa Agus Sito, bu Pamiyati, Pa Yani sareng bojona, teu kakantun ah Pa Edi sareng istri, oge ka pa gilbert jeung bu ivon, si UM tah nu sami-sami di rumah sakit nuju ngarawat putrana, wa ucu, ode, hiji deui yeuh nu purah kaditu kadieu kang yayan, nuhun kasadayana mugia Gusti Allah maparin urang sadaya kasalametan tur ka bagjaan dina salami urang rumingkang di alam dunya ieu.
wassalam.